新聞類別
副刊
詳情#
【明報專訊】又到聖誕，又到聖誕！Happy Mama最鍾意過聖誕節，因為可以幫小朋友準備party同聖誕禮物，大街小巷又佈滿靚靚燈飾，真係好開心。
當然，聖誕節絕對唔係淨係得消費嘅，尤其係呢一代小朋友，大部分過住富裕生活，Mama認為做父母喺送禮物畀仔女之餘，亦應該畀機會佢哋學習付出、分享。坊間有唔少機構，都喺聖誕期間舉辦慈善活動，等大家藉呢個節日同親朋好友歡聚嘅同時，都唔好忘記為有需要人士送上祝福同溫暖。
添置派對眼鏡 義賣籌款
好似信和集團旗下酒店，同本地創作品牌Chocolate Rain創作總監Prudence Mak合作嘅「愛心聖誕大行動」，早前將舊衣物「升級再造」，成為不一樣的聖誕禮物——由Chocolate Rain將大家捐贈來的衣物拼接，縫製成50幾張環保百家被，喺今個月中送畀長者同有需要人士，真正為他人送暖！而大家由今日起至12月28日，都可以去信和集團旗下酒店，參與派對眼鏡的義賣活動，派對眼鏡每套＄90，善款將全數撥捐「愛心聖誕大行動」。
苗圃雲南慈善團 聖誕別具意義
另一個可以體現愛心嘅活動，就係苗圃行動主辦嘅苗圃童樂行，目的為雲南省水富苗圃兒童福利院籌募經費，今年舉行日期係12月25至30日，歡迎一家大細為活動籌款，然後趁假期齊齊去雲南水富縣，參與探訪活動兼參觀四川自貢動物園、恐龍博物館，想小朋友過一個特別有意義嘅聖誕，記得趁早報名啦。
童樂行查詢﹕walkforchildren.sowers.org.hk
留言 (0)
