西環精神書局 石塘嘴重開

【明報專訊】有超過半世紀歷史嘅精神書局，扎根西環10年嘅分店喺10月底因不敵加租而結業。事隔個幾月，Emily收到風，書局第三代傳人「童年方展博」黃寶龍喺舊址旁邊，即係石塘嘴屈地街公園附近搵到新舖，噚日正式重開。


黃寶龍話，上址業主因為遇上「租霸」，突然中止租約同放租，佢一收到代理消息即刻搵業主傾，發現業主同爸爸係舊相識，可以用較低嘅價錢租個舖位，而且新舖同以前差不多大細，一切都靠「好彩」。佢又話，之前結業無諗過咁快會搵到舖位，所以已捐出8000幾本書畀慈善團體，佢呼籲書迷趁新年前執屋嘅時候賣舊書，等舊書可喺佢間舖搵到新主人。


不過，書店因為開得比較急，未搵到人裝修，黃寶龍決定等過咗農曆新年先裝修，家嘅裝修只喺「臨時性質」，遲啲可能會以全新面目見人。