立會火警演習 僅10個議員走

【明報專訊】立法會大會近排不時流會，估唔到連立法會大樓嘅火警演習，都面對議員人數少嘅問題。噚日晏晝12點半舉行嘅火警演習，立法會內人員由大樓「逃生」到隔籬添馬公園，由火警鐘響起到宣布完成演習嘅大約10幾分鐘內，有500幾人「走火警」，不過當中只得10個議員。


大嚿質疑「唔夠半數」應無效

星期三喺大會要求點人數、令大會流會嘅公民黨陳家洛，講笑咁話走火警唔夠法定人數，要求點人，又同泛民會議召集人何秀蘭講，希望對方召集多啲人嚟演習咁話。不時喺議會拉布嘅人民力量陳偉業，就「宣布」走火警「無效」，覺得唔夠35人，應該要再走過。立法會主席曾鈺成好體諒，走火警議員少，可能由於噚日中午無會開，所以好多議員根本唔喺大樓內。


民建聯葉國謙話，自己喺響鐘後遲咗半分鐘先走，因為要搞掂手頭工作，始終演習無咁大心理壓力。至於擔唔擔心真係火警嘅時候走唔切，阿謙就講笑咁話，驚唔驚「葬身火海」嘅問題，其實記者都要面對。


泛民建制打平 3人「臨陣逃脫」

今次火警演習出席人數，泛民同建制打成平手，各有5人出席，泛民有馮檢基、張國柱、何秀蘭、陳家洛同陳偉業，建制就有主席曾鈺成、葉國謙、譚耀宗、黃定光同馬逢國。不過，其實有議員喺火警鐘響之前已離開大樓，包括李慧琼、單仲偕同郭偉強。單仲偕好坦白咁話要食飯，郭偉強就話約咗睇醫生。