《星球大戰》 要睇中國頭

【明報專訊】《星球大戰》（Star War）最新一集即將上映，香港星戰迷普遍都睇好，仲覺得條預告片唔錯，但係股市就有另一個睇法。睇番星戰電影廠商迪士尼股價上個禮拜表現，已經跌足一星期，合共跌足半成咁多。《巴隆氏周刊》就引述巴克萊解釋，話投資者應該唔睇好今集星戰，同埋又關中國事。


衍生商品內地不夠受歡迎

星戰明明講到銀河帝國咁遠，點解仲會受祖國牽制？據巴克萊所講，事關中國明明係個好大嘅市場，偏偏星戰衍生商品喺內地唔夠受歡迎，隨時令潛在嘅20億至30億美元（約156億至234億港元）收益受阻。


回顧番2013年上畫嘅《魔雪奇緣》(Frozen)，紅遍全球，喺中國市場表現尚算可以，票房收約3億元人民幣，以國內票房計屬於不俗，代表係中國頗受歡迎，甚至今年內地更推出山寨版，名為《魔鏡奇緣》，可見原版備受同胞重視。查番《魔雪奇緣》上畫當年迪士尼股價，全年大漲超過五成，創24年以來最大年升幅，同胞鍾意嘅電影總係帶來好腳頭。睇番今次星戰，單計上個禮拜五，迪士尼股價已經跌成2.55%，唔通無論邊一個星球，都要睇中國頭？


不過，巴克萊又唔係叫大家唔好入場睇戲，佢話投資者只係預咗套戲唔係迪士尼歷來最好嘅電影之一，但巴克萊始終覺得套戲喺商業角度上依然會成功。


股價票房 無必然關係

但環顧咁多電影廠商，係咪每次都可以用一套戲嚟量度全年股價呢？夢工場代表作有2005年嘅《荒失失奇兵》，但當年股價插水超過三成。又例如夢工場2013年主要有《古魯家族》同《極速TURBO》上畫，兩套票房合共只不過8.6億美元，但當年夢工場股價大漲1.14倍；反觀2007年單計《史力加3》票房已經高達8億美元，但全年股價卻倒跌13%。所以股價升跌係咪可以全數歸咎落一套戲上面，就各有定論嘞！


撰文：鄭智文