斥打擊非法倒垃圾不力 民主黨「孖寶」30袋垃圾放食環抗議

【明報專訊】民主黨將舉行內部甄選黨員明年參加立法會選舉，大家當然要好好表現自己先啦。該黨嘅中西區「孖寶」、區議員許智峯及候任區議員吳兆康，噚日就有新搞作，今次唔係再去「佔領」民政總署，而係同埋一班義工，將超過30袋喺街上收集到嘅棄置垃圾，攞去食環署中西區辦事處門口，話要抗議政府打擊非法傾倒垃圾不力。


民建聯嘅人成日公布衛生黑點，而呢兩名「乳鴿」就玩大啲，索性收集垃圾去抗議，話咁做係要迫使食環署面對問題，「自己社區自己救」，因市民唔能夠接受生活喺一個垃圾社區！

佢哋話中西區酒吧食肆林立，非法傾倒垃圾問題嚴重，過往議員喺區議會內反映過問題，但未見食環署加強檢控，話喺2011至2014年內，食環署於中區酒吧區內檢控非法傾倒垃圾嘅個案數字，每年均少於30宗，認為力度唔夠。