環團籲關注過度消費 聖誕女郎爬商場掛大banner

【明報專訊】聖誕節好多人都會買禮物送畀人，商戶亦大減價，聖誕節好似同買嘢離唔開關係。綠色和平組成「聖誕老人部隊」，噚日就喺銅鑼灣時代廣場十幾層高嘅外牆游繩爬落嚟，掛咗幅17米乘10米嘅巨型banner，呼籲大家關注過度消費嘅問題。


聖誕老人部隊入面，有個第一次參加行動嘅綠色和平資深項目主任Kate。阿Kate話平日做開防治污染項目，但今個聖誕佢打算畀個挑戰自己，所以做咗聖誕女郎，呼籲大家審慎購物喎。


時代廣場公關同Emily講，班環保人士入咗13樓嘅平台花園後，反鎖通道大門，游繩爬出外牆，勸完佢哋都無用，唯有報警。警察同消防員到場後都好緊張，仲開埋救生墊，附近交通亦因而受阻咗一陣。