上載國旗相 馮煒光：自小便要有國家觀

【明報專訊】唔少官員趁聖誕節四散去外國旅行，連特首梁振英都去咗馬來西亞度假。而愛國嘅新聞統籌專員馮煒光（IC）就去內地參加單車籌款，其間IC途經湖南省株洲市茶陵縣一家幼稚園，見到校園紅旗飄揚，不禁感慨地喺facebook分享話「自小便要有正確國家觀」。


IC喺茶陵縣過「拆禮物日」，仲影咗一張當地小朋友穿上聖誕老人裝扮、喺街上慶祝嘅相，IC話當地都好有聖誕氣氛，但「媒體不會感興趣」喎。


早前就有香港媒體報道過愈來愈多內地人慶祝聖誕節；而湖南省長沙市亦有身穿漢服嘅高校學生，今年繼續喺市面示威，呼籲民眾回歸中國傳統節日，抵制聖誕節。唔知IC今次有無機會去湖南省其他城市睇吓民情呢。