建發國際「業務國際化」

【明報專訊】有啲人天生好有幽默感，好似年前被廈門建發集團收購咗嘅西南環保（1908），主席莊躍凱就堅稱佢哋唔係買殼，而係繼續營運西南環保嘅原有業務，再加以擴展，但問到佢究竟係搞咩業務？公司答法好周星馳式，佢話公司改咗名叫建發國際，有名你叫，咪就喺國際化嘅業務喎。


成為廈門建發海外資本平台

小琴粗略查過吓，香港超過1500間上市公司，有214間公司名有「國際」兩個字，不過國際化到好似長和（0001）咁，都無「國際」兩個字，呢個邏輯認真難明。


莊生話，母公司廈門建發雖然每年營業收入超過1000億人民幣，但建發國際就可以成為廈門建發嘅海外資本平台，仲話廈門建發而家持有建發國際75%股權，將來可望引入投資者，攤薄到58.36%，令股權更多元化。


而講到公司同啲海外平台洽談緊合作，咁有啲咩國家？莊生又再發揮詼諧本色：「有唔同嘅國家，因為要國際化。」


email: [email protected]

[小琴密語]