２．金管局收緊按揭

【明報專訊】港樓貴絕全球，連年升價，政府政策不協調，絕對「應記一功」。本來過去幾年力推「辣招」，好不容易令樓市交投淡靜咗，去年5月卻突然放寬雙倍印花稅（DSD）換樓期限，變相谷爆二手樓，中原指數係咁升，細價樓更愈嚟愈瘋狂。不知道政府究竟搞邊科，轉過頭金管局在2月27日宣布收緊按揭成數，由1991年開始推出七成按揭，從此拜拜。（當然，如果經按證公司，都仲可以做到八成，個別首置買家更達九成）。


消息一出，地產股尾市急跌都算其次，大批買家趕尾班車，連夜買樓，個別成交更高出市價一成，以避開第二日生效嘅新例。


地產商走出嚟話，措施對樓價無影響。升斗市民訴苦，話收緊按揭對降低樓價無用。查實大家都誤會了，金管局不是要幫大家上車，你愈係借唔到錢買樓，佢愈開心，因為個個當加息係狼來了，槓桿咁高，美國一加息，買家還不起錢，死的就是銀行，金管局咁做，其實只係求自保。