2015風雲人物

【明報專訊】年度風雲人物──李嘉誠

1月初長和系宣布重組遷冊，9月初長建同電能提出合併，其後被內地媒體指撤資，大鬧一番後，長實一個屈尾十，闊別8年再奪將軍澳康城地。無論是長和系公司的舉動，還是誠哥的個人感言，都是財經頭條。每朝6點鐘，依舊有大批記者在深水灣道李氏大宅門外守候。這個87歲的老人家，舉手投足仍然是全城焦點。


過山車車主──李河君

1990年代初做貿易生意，忽然有大筆錢搞水力發電，國開行無限量支持下，又有錢研發太陽能，最厲害的是，漢能集團主要業務都無上市，在香港的上市子公司，市值一度超越3700億元，幾乎高過長和。但好景不常，5月份漢能股價暴跌47％後停牌，證監會證實正在調查漢能，李河君的首富之旅，相信已經落幕。


最「無能為力」──陳德霖

外匯基金首3季勁蝕，金管局總裁陳德霖不禁嘆一句「無能為力」，其實他受到的限制，又豈止投資市場。今年初金管局收緊按揭成數，防止槓桿過高，但銀行借不到錢，財仔不受金管局監管，照樣高息高成數借貸，到年底連發展商都玩埋一份。道高一呎魔高一丈，陳總照顧好銀行體系，已經功德無量啦！


最悲情人物──被裁銀行職員

今年要向一眾銀行員工致敬，當初意氣風發，讀BBA、讀Quan-Fin、讀精算，畢業後一心學Jordan Belfort，做隻IFC狼人，點估到有一日會望住個空了一半的辦公室執包袱？不需要怪自己，你們只是外行過去過度擴張、策略失敗的無辜犧牲品，「良心究竟係乜嘢」無人知，但我知道「你哋無做錯到」！

最壯烈犧牲──恩達39「接貨」烈士

買股票要交學費，是好顯淺的道理，但如果命運能選擇，你可能寧願不買股票不交學費。講緊嘅係39個烈士，喺半新股恩達突然升穿100元，半晝之間變紅底股，有39宗交易是100元以上錄得。怎料股價收市跌剩17.44元，39宗交易共蝕近千萬。唔緊要啦，去得夜場玩，唔通想搵真愛咩？


最長氣阿伯──湯文亮

日講夜講話細價樓會爆煲，由年頭講到年尾，分析員林一鳴反駁佢，佢仲激氣到要下戰書，同人賭餐飯，雖然最後認輸宴擺了林一鳴無出現，買家繼續向發展商借高成數按揭買「豪華劏房」。但唔經唔覺美國已經加了息，唔經唔覺其實二手係咁割價，或者係時候要聽聽老人言。