品客薯片新包裝縮水 筒口「瘦」咗 網民怨「手都伸不進」

【明報專訊】今日元旦，唔少人會開派對，薯片等零食最受歡迎，原來港人熟悉品牌、嘜頭似「財爺」曾俊華嘅品客薯片，推出新包裝，卻「縮水」，薯片淨重由134克減至110克，大減近兩成，產地由美國改為馬來西亞。Emily喺同一超市買到兩款不同包裝嘅新、舊產品，售價同樣係12.5元，包裝縮水後即係變相加價啦。


淨重減近兩成 價錢相若

Emily將新、舊版薯片比較，新版明顯較細塊，同為5塊薯片，舊版重9克，新版只重7克，即每塊薯片分量輕咗約22%！另外，新包裝筒身高度雖然同舊嘅一樣，但筒口直徑就由約7.8厘米減至約7厘米，足足「瘦」咗一圈，有網民抱怨「連手都伸不進去」。


產地由美國變大馬

除咗包裝變咗，新版產地同口味都有變。根據筒身生產標籤，舊版生產地為美國，新版產自馬來西亞。食物成分上，舊版使用葵花油，新版用棕櫚油。


Emily以消費者身分詢問品客嘅香港代理商利豐，職員話品客生產商有變，換咗新包裝，舊版唔會再推出，但市面仍有「貨尾」。職員透露新版品客口味難免有變，至於換包裝原因，職員話係生產商決定。