租劏房專家 工黨主席：要揀賓館樓上

【明報專訊】新上任嘅工黨主席胡穗珊（圖）除咗熟悉民間社會、工運同女性權益等議題外，原來仲係租「劏房專家」，有一套租劏房心得﹕識揀就要揀時鐘賓館樓上嘅劏房，因為保安一定唔差，「賓館24小時有人睇住，住佢樓上就唔使驚有可疑人物出沒」。佢仲話賓館為咗吸客，一定會將樓梯裝修得好靚好乾淨，住賓館樓上有着數。


胡穗珊笑言近年「寄貓籬下」，話自己養咗兩隻貓，但由於有太多工作在身，喺屋企時間唔多，所以間屋長時間由兩隻貓「霸佔」。


10年前月租1900元

胡穗珊又同Emily講，逾10年前大學畢業時希望有私人空間，所以努力打工掙錢，掙夠租劏房上期就瞞住阿媽去租劏房住，差啲激死阿媽。佢話當時一個100呎左右、有獨立廁所嘅劏房，月租只需要1900元，往後都住過其他劏房，直到近年人工多咗，先租住私人單位。


胡穗珊話揀劏房一定要留意電線有無外露、樓宇間安全同走火問題，當日住劏房時最擔心就係火警問題。