土木署為古洞北發展區請社工隊

【明報專訊】社署招標請社工隊就見得多，Emily聽聞最近土木工程署都要招標請社工隊，原來係要為古洞北新發展區提供服務，促進受新發展影響人士同政府之間嘅溝通，營運將於古洞北成立嘅社區聯絡中心。


網民憂獨立性

其實招標喺上年10月底已完成，並由路德會投得合約，12月已開始工作，但該項招標噚日就被社工復興同關注古洞發展嘅網民轉載，擔心社工隊由部門聘任，獨立性成疑。


土木署同Emily講，社工隊由4名專業註冊社工同1名社區聯絡主任組成，成立目的係希望透過社工，為受影響居民提供有關資訊，等佢哋可以更了解新發展區嘅發展方案同進度。


署方又強調，社工隊主要角色係溝通橋樑，由署方負責聘請唔會影響社工隊工作同服務質素。Emily睇落，今次土木署都係參考市建局之前收舊樓做法，照辦煮碗。