區選開支 民建聯花500元音樂版權費

【明報專訊】新一屆區議員今日正式上任，不過區選候選人無論贏輸，都要喺前日交足選舉開支申報資料。Emily噚日去選舉事務處睇文件，發現民建聯為區選前一個喺遮打花園舉行嘅造勢大會，畀咗500蚊背景音樂版權費，果然謹慎。


民建聯鍾樹根今屆區選意外落敗，佢喺其他開支項目下面，就申報咗「李慧琼錄音」、「曾鈺成錄音」同「譚耀宗錄音」，相信係選舉期間播放以吸引選民支持，雖然呢3個項目唔涉及使費，但樹根都將佢哋歸納喺行政費下面申報，相信係為以防萬一。


落選周嘉發被食環罰1500

民協副主席譚國僑今屆區選以近600票差距擊敗主要對手，喺佢嘅開支申報中，有幾個歸納喺助手薪金嘅「催票電郵」項目（同樣係唔使錢），唔知呢啲電郵係咪佢嘅致勝關鍵呢？另外，落選深水埗又一村嘅社民連成員周嘉發，今屆區選經費接近6萬蚊，但當中最少有1500蚊撥咗去政府庫房，原來佢喺競選期間兩次被食環署移除違規宣傳品，同時被罰款。