似戴卓爾夫人？ 卿姐：黨內無逼宮

【明報專訊】民主黨前成員狄志遠日前話，有民主黨成員向佢透露該黨主席劉慧卿唔再參選立法會嘅情况，就好似當年英國保守黨黨魁戴卓爾夫人一樣被年輕黨員拉落台。噚日卿姐出席節目後就話，相信黨內、黨外有唔同聲音，有人覺得係一定唔可以退，呢啲聲音永遠都會存在，又話「狄生想講咩，個嘴生喺佢塊面，係無問題」。卿姐又話雖然香港好驚一國兩制影響自由，但仍然都有言論自由，所以其他人絕對有自由發表佢嘅意見。


劉慧卿噚日出席《城市論壇》，主持人蘇敬恆問佢，民主黨副主席尹兆堅曾經話「明顯這班前輩與新世代格格不入」，卿姐就回應話，黨內無「逼宮」成分，不過佢就覺得黨有咩意見尹兆堅可以發表，不過最好傾咗先，然後先公開發表。卿姐又回應尹兆堅嘅言論，話「我唔同意我唔會決定唔選」。


卿姐又再次感謝香港市民，話自己唔係殘留嘅軀殼，仍然有好多拼勁，要維繫香港嘅核心價值。