議員參觀拆彈組搞搞震 謝偉俊著炸彈保護衣「似登月」

【明報專訊】抗戰結束都有70年，但時至今日亦不時見到有戰時炸彈出現，要出動警方拆彈專家引爆。噚日立法會保安事務委員會連同其他議員共18人，到灣仔警察總部參觀爆炸品處理課，睇吓拆彈同偵測儀器、手提X光機等，連前年喺跑馬地檢獲嘅1000磅英軍戰時空投炸彈都有。警方又喺議員面前試爆重3克嘅炸藥，3克只不過約等同3張20蚊紙嘅重量，但係警方話好多恐怖襲擊入面嘅土製炸彈，量少但威力大，而佢哋每年都要處理約120宗炸彈發現案。


警示範遙控拆彈機械人

其他節目亦非常豐富，有得睇警方示範用價值260萬元、用咗18年嘅遙控拆彈機械人處理爆炸品，以及土製炸彈可以點引爆等等，成班議員好似小學生第一次去旅行咁興奮。


其中謝偉俊就最過癮，可以試著總重35公斤嘅保護衣，行幾步路「試重」，但步速好似太空人登陸月球，佢試完都不斷話「真係好重」。唔知係咪齋聽阿sir講解好悶，好多議員聽聽吓都會「搞搞震」，唔理咩黨派都不約而同攞枱上嘅炸藥炸彈擺pose，雖然話啲炸藥炸彈無晒效力好安全，但議員們都應該留心聽書！