新丁議員余德寶 影相畀條呔考起

【明報專訊】噚日係新一屆油尖旺區議會第一次會議，開會後一班區議員就排排企諗住影番張大合照，點知一班議員企咗喺度等咗一輪，數嚟數去都仲差一個議員，原來係新丁議員、公民黨余德寶仲未打好呔。當區資深議員仇振輝一知道，就一支箭咁衝埋去，幫佢打靚條呔。


話說余德寶噚日無打呔去開會，但去到大合照環節，因為大家都習慣打條呔影相，秘書處職員就拎咗條區議會呔畀佢，點知佢搞咗一輪都係搞唔掂。余德寶同Emily講，平時落區都唔打呔，少操練，打咗3次都唔靚，拆咗幾次出嚟。余德寶話會返去練習多啲打呔，因為「唔係吓吓仇sir都喺度」喎。