中學生訪無家者 印象大改觀

【明報專訊】「有個婆婆話搵唔到生存意義，死咗去仲好……」講到呢度，女同學仔不禁露出失望表情；另一男同學又話，「我見到佢喺我隔籬打針，應該係注射毒品，嗰一刻真係好激動，我見到支針有血，我好想阻止佢，但我做唔到。」呢啲都係何明華會督銀禧中學嘅中三、四學生，第一次探無家者嘅所見所聞。


學校20幾個學生上個月同兩名老師、一個義工，一齊探訪深水埗欽州街橋底嘅無家者，發現只係提供居住地方係唔足夠。有學生同Emily分享，有個露宿多年嘅婆婆，原本獲派沙田公屋，但因為遠離原來露宿嘅地方，又要坐輪椅，上落出入唔方便，最重要係因為見唔到一班朋友，所以拒絕「上樓」，令學生諗到，除解決無家者嘅住屋問題，更要解決佢哋嘅心理需要。


學生又帶咗物資同無家者分享，當佢哋派毛巾時，有無家者話「我唔需要喇，你畀其他有需要嘅人吧」，令學生大為詫異，發現佢哋嘅鄰里關係比想像中好，就好似一個小社區。另一學生同Emily講，原本對無家者印象好負面，但傾偈後改觀咗，「佢哋都係普通人，只係屋企同我哋唔同，最緊要都係平等對待」。