有話說：哲學繪本 教子女享受思考

【明報專訊】上一期Mama問各位爸媽想同啲仔女點過2016年，相信有計劃有目標嘅你，一早已經為佢地安排好晒！當然，Mama都有同囝囝傾過今年嘅計劃、目標。講講下，囝囝突然問我﹕「媽咪呀，一年有咁多嘢做，咩先係最重要嘅事吖？我點先知我應該幾時做啲咩吖？」雖然聽落問題好似好普通，但佢突然咁問，老實講，真係唔知點答喎。


無標準答案的三個問題

好彩最近有朋友介紹一本叫《尼古拉的三個問題》嘅哲學繪本畀Mama，呢本書係改編自俄國大文豪托爾斯泰著名的短篇《三個問題》，為咗講畀小朋友聽，作者瓊．穆特以水彩描繪可愛的小動物，重新演繹呢部經典作品。


而阿仔問嘅，就正正係繪本由頭到尾都成日講嘅三個問題——何時是最佳時機？誰是最重要的人？什麼是最重要的事情？書中嘅小男孩尼古拉認為，如果佢搵到呢三個問題嘅答案，咁佢就永遠唔會有錯失。當大部分爸媽聽到仔女問啲咁嘅問題，通常都會叫佢地唔好問咁多嘢，總之按父母嘅計劃照做就冇錯啦，因為爸媽做永遠係「For your own good」！


書中男孩認為「我只要找到答案，那我就知道該怎麼做了」，香港實踐哲學學會會長盧傑雄曾喺訪問時指出，哲學唔會直接話畀小朋友知乜嘢係「最好」，反而鼓勵孩子們思考「什麼才是最好」。佢一語提醒咗Mama，所有嘢都冇標準答案，唔好成日諗住幫小朋友plan好所有嘢、畀晒公式佢哋照跟就實冇死。咁樣只會令佢哋淪為working machine，一味機械式地完成那「水蛇春」咁長的to do list，卻缺乏享受思考嘅過程。


不再為做而做 改善親子關係

雖然講「哲學」好似好玄咁，其實Mama唔係叫各位爸媽唔好為孩子訂立計劃，而係當仔女執行計劃時，嘗試同時帶動佢哋思考「點解要做呢件事」，例如考試前要溫書，好多小朋友會覺得呢樣係爸媽「要我做嘅事」，但佢哋唔會諗到「點解要做呢件事」，如果能帶動佢哋思考，令佢哋覺得溫書唔係為父母而溫，係為咗增長知識而做，相信大家嘅親子關係應該會有改善。