馮煒光：本土非「公餘回母校做義工」

【明報專訊】特首梁振英經常喺唔同場合狠批本土意識，不過財爺曾俊華早前就唱反調，喺網誌以自己喇沙書院舊生為例，將「喇沙仔那股對學校近乎狂熱的歸屬感」，與近年流行嘅「本土思潮」相提並論，認為「有不少共通之處」，仲話呢種感情可以團結成具建設性力量，推動香港變得更好。經常為特首護航嘅新聞統籌專員馮煒光，噚日喺報章專欄就大談本土思潮，大鬧本土「異化」咗，仲唔點名話，今時今日講嘅本土並非「公餘時回母校做義工」，而係包裝咗嘅港獨、分離主義。


話要敢批評「賣分離狗肉」嘅人

馮專員又話，雖然可以表揚同鼓勵本土積極一面，但都要有膽識批評「掛本土羊頭，賣分離狗肉」嘅青年人，如果「是其是，不非其非」，對社會無好處。馮煒光呢番評論，唔知係咪針對財爺早前唱好本土嘅言論呢？


馮煒光仲公開挑戰話，如果「本土派」聲明，香港係中國一部分，以及譴責港獨、反對分離，佢先會承認佢哋係真正「本土」。