政府辦啟德街道命名賽 網民提「銅鑼灣五子喺邊道」

【明報專訊】土木工程拓展署噚日推出一個「名繫啟德坊行人專用街道命名比賽」，呼籲公眾就啟德坊內10條行人專用街道提供具創意嘅中文名字，政府新聞網facebook噚日就上載呢個項目，結果唔講都知，大批網民發揮創意提供「惡搞」街名，包括有人借銅鑼灣書店5人失蹤事件發揮，建議改名「銅鑼灣五子喺邊道」、「吳亮星北上大道」、「亮星好熟路」、「中共好霸道」等。


呢項活動分為公開組和學生組，獎品都豐富，公開組冠、亞、季軍分別可獲1萬元、6000元和4000元獎金，學生組冠、亞、季軍分別可獲3000元、2000元和1000元獎金。比賽截止報名日期為2月2日，詳情載於比賽網站www.ktd-streetnaming.hk。土木工程拓展署啟德辦事處專員應芬芳話，希望透過比賽徵集具創意嘅街道名稱，以展現啟德坊嘅地區特色，呼應啟德發展嘅規劃願景。


不過，唔少人已急不及待喺政府新聞網fb提交建議，有啲網民用粗口諧音改名；亦有人好認真，好似有人提議「啟民道」、「啟聯道」、「啟禮道」，好配合地區特色；但唔少人就擺明針對特首梁振英，提議「梁振英書記大道」、 「689安心上路」等。


其實，早前廉署公署徵集防貪口號，已出現網民洗版情况，難怪有網民話唔明白政府點解唔汲取教訓喎。