東區區會投票要「等埋蔡素玉」 建制包辦20職位

【明報專訊】繼政改表決「等埋發叔」之後，又有一名資深議員要人投票等埋佢。民主黨東區區議員趙家賢同Emily講，噚日東區區議會選正副主席，當在席嘅議員都入晒去投票，照計應該開始點票唱票時，主持會議嘅民政專員就話要等埋仲未到達會議室嘅民建聯蔡素玉（蔡蔡子）。


趙家賢當時問，係咪繼「等埋發叔」之後，家仲要「等埋蔡蔡子」，但專員就話，按照指引投票要喺投票開始15分鐘內結束，時間未到所以可以等埋。趙家賢同Emily講，不嬲只要大部分人都投晒票，會議主持就可以宣布投票結束，加上要等嘅人根本唔在場，覺得係有心「拉布」等埋蔡素玉，等建制派可以齊齊整整投票。結果蔡素玉趕及返嚟投，並無甩碌。


趙家賢話，初頭收到風，話其中一個專責小組嘅副主席，建制派會留畀泛民，但最後大會、6個委員會、3個專責小組嘅正副主席，一共20個位，無一個係泛民。