馬時亨「回憶牆」前自拍

【明報專訊】港鐵新任主席馬時亨（後右二）上任唔夠一個禮拜，見咗傳媒兩次，噚日喺九龍站搞傳媒茶敘，帶傳媒預覽預計今年第二季開幕嘅「港鐵展廊」。Emily去參觀過，展廊嘅最大特色係用咗8000張、超過600款車票砌成嘅「回憶牆」，遠睇會見到較淺色嘅車票喺牆上砌出「MTR Gallery」嘅字樣，連馬時亨、行政總裁梁國權（持相機者）等人都忍唔住同多名港鐵公關喺牆前「自拍」留念。


講到「回憶牆」上最老嘅車票，就係1979年9月30日嘅通車首日紀念車票，亦有2000年港鐵上市、印有「66」字樣嘅股東紀念車票。展廊亦展出港鐵列車模型，包括第一代載客列車，亦有「一比一」嘅列車車卡模型，日後可舉辦公眾活動。