葉劉助後生仔東南亞起飛

【明報專訊】新民黨主席葉劉淑儀緊貼中央一帶一路風向，早前成立「海上絲綢之路協會」，上個月喺協會下又成立青年機遇委員會，重頭戲係今年暑期舉行嘅「張騫計劃」，為100個大學生提供4至8星期嘅實習活動。葉太噚日話，佢哋目前已經確定咗90幾個實習位，就快達標，公司包括香格里拉酒店、太古集團、中銀、 中華電力等，唔少實習地點都喺東南亞沿線，包括曼谷、新加坡、越南等。


呢個計劃擺明係搭跑道幫後生仔起飛，成功參加計劃嘅學生唔需要自掏腰包，提供實習機會嘅公司會出錢出力提供埋來回機票、食宿等。


協會另一個活動就係3月嘅「福建泉州之旅」，Emily見到，只要係「海絲會」學生成員，畀100元就可以玩足5日，其他費用由協會承擔。葉太預料協會要為活動籌款40萬元。咁多機會提供畀大學生，唔知素來愛招攬人才嘅葉太會唔會趁機吸納年輕黨員，壯大新民黨？葉太就澄清活動同政黨無關。