教協派「真成績表」 逾六成教師畀吳克儉零分

【明報專訊】港大民意研究計劃早前公布咗教育局長吳克儉嘅民望支持淨值係-48.8分，教協噚日又派咗張「真成績表」畀吳克儉，由2192個教師評價吳嘅工作表現，成績係……0.56分（5分係滿分），雖然求學不是求分數，但有成64.7%嘅教師畀隻蛋佢食，真係愛之深、責之切。


TSA存廢爭議成教育新聞榜首

教協訪問嘅教師之中，包括專上教師408人、中學教師885人、小學教師701人，同埋幼師198人。做咗教師幾十年嘅教協副會長黃克廉就將吳克儉比喻作學生，「所有書都唔讀，梗係0分啦，如果佢是但讀一課書（解決教育議題），都一定會進步㗎，但冇可能咁要求一個人，為咗高少少分就做少少嘢」。黃又話，吳身為教育局最高負責人，有責任令香港教育全面發展，但佢一樣都做唔到，「過去幾年都交白卷」。盼嚟吳同學真係要反省吓喇。


另外，教協都發表咗「2015年十大教育新聞」。高踞榜首嘅就係「全港性系統評估（TSA）存廢爭議，過萬家長網上組成群組反對小三TSA」，得391票；然後係「港大委副校長風波，校委會最終拒任命陳文敏」，得363票；第三位「基真女童墮樓慘劇，揭部分學校『報警指引』有重大錯誤」，得323票。