【明報專訊】股神巴菲特同微軟創辦人蓋茨上個月尾旋風式訪華，吸引全球目光，佢哋搞果個「巴比慈善晚宴」更加係成個旅程嘅焦點，引來大批中外傳媒追訪。不過，香港大學建築系助理教授朱濤前兩日就響本港一份報章撰文指出，慈善晚宴舉行嘅地點、北京市郊嘅「拉斐特城堡莊園」，就係朱教授成日對學生講嘅「現代墮落空間文化最惡俗例子」之一。個城堡當年興建之時，曾經令到一大批農民失去家園， 同一地點今次聚集咗一大班富豪共商慈善大計，朱教授形容事件簡直係「荒誕劇嘅最高境界」。
呢個拉斐特城堡莊園，係由北京地產商宇辰集團董事長、前北京市建設局高層張宇辰一手策劃及出資興建。張老闆2005年登上《胡潤排行榜》351位，佢曾經向內地傳媒表示，18歲睇咗《基度山恩仇錄》後，就想喺中國複製一座法國城堡，最終佢由01至04年間「動用自己的全部精力」，收集大量資料及研究，興建咗呢個充滿法國風情嘅城堡。
低價徵地建城堡 農民失家園
咁大個地產項目，背後當然仲有好多故事。朱教授引述《紐約時報》2004年底一篇報道，指為咗城堡佔用近4平方公里嘅土地，北京昌平區政府同張老闆達成一宗不尋常交易：政府先將土地從農田轉性為綠地保護區，張老闆每年畀約200萬元租金來「保護」該綠地。其後張老闆獲准喺其中0.7平方公里土地上修建城堡及1000個豪華住宅，張老闆須另外支付昌平政府約6500萬元。報道指出，原本喺當地耕種維生嘅800個農民投訴補償過低，城堡實際佔地又係批准用地嘅3倍等等。
富豪今城堡商善舉 實屬荒誕
朱教授話自己冇資格評論報道真偽，但就可以毫不猶豫咁話個城堡係「建築文化無恥墮落的一個實例」，因為佢體現咗世人急劇走向現代化時容易犯嘅可悲病症，就係「對自己當下文化狀况極端不自信，對某種抽象化、神話般的，和自己的身世八竿子打不到邊——愈『離譜』愈好，因而愈發顯得『高貴』的『古典傳統』的迷信。」
朱教授又慨嘆，家全中國各大城市都忙於打造各種「歐陸風情」及歐美城鎮，拉斐特城堡只不過是無數鬧劇中嘅其中一齣而已。計小琴話，香港啲樓盤都好鍾意Sell歐陸風情及歐洲貴族Feel，鬧劇又何止喺內地上映呢！
