田生申轉主板 股價事先爆升

【明報專訊】收舊樓收到出晒名嘅田生（8136），前幾日宣布申請轉主板，雖然幾時落實未知，但股價已經升到「嘭嘭聲」，小琴聽講佢哋呢排見唔少投資者，好似想「升格」做發展商，唔怪得個股價都升咗咁多格啦！

想升呢做發展商

經過幾日來嘅爆升，田生已經唔再係「亳子股」，噚日一度急升超過三成，以接近全日高位嘅1.49元收市，創咗上市以來新高。

田生作為收買舊樓專家，好多大發展商例如四叔嘅恒地（0012）都要同佢哋買舊樓。雖然過去有唔少負面新聞質疑田生嘅收樓手法，不過小琴聽到啲路邊社消息，話佢哋嚟緊想做埋發展商，如果屬實，就認真係「肥水不流別人田」咯。但係識收舊樓唔代表識起樓，假如田生真係想升格做發展商，唔知會唔會向四叔請教吓，甚至乎伙拍恒地一齊起樓呢？