匯豐私銀一姐王以智退休

【明報專訊】獅子銀行女強人輩出，不過部分年屆退休年齡，好似已過檔姊妹行恒生（0011）做行政總裁嘅梁高美懿（Margaret）原來已經57歲，仲有幾年就退下火線，而私人銀行亞洲區嘅一姐王以智（Monica），噚日就宣布做到今年底退休。聽講Monica退休之後會專注自己嘅興趣，小琴即刻諗，仲唔係專心跳舞？

年逾60 外貌年輕

Monica熱愛跳舞，好多人都知。事關2006年一單官司，揭露佢以天價1.2億元學費，跟隨拉丁舞王舞后學舞8年，引起全城熱話。當年因為舞王喺公開練習嘅時候羞辱佢，Monica就同舞王對簿公堂，成功追討6200萬預繳學費。小琴睇番昔日報道，Monica當時年屆花甲，屈指一算，如今約莫65歲，但係仲keep得非常之好，日前著晚裝出席慈善晚宴，仍然容光煥發、身形標準，大大話話比真實年齡後生10幾年。

有朋友同小琴講，Monica日日用1、2句鐘做運動。佢曾經講過，除咗跳舞（拉丁、Modern Ballet、Jazz）之外，仲鍾意玩泰拳。作為一代船王王國桐嘅千金，Monica多才多藝，唱歌同彈琴都了得，仲曾經開金口籌款。Monica退休後，會成為匯豐私人銀行嘅非執行董事。佢原本嘅職位——匯豐私人銀行亞太區行政總裁，將會一分為二，由廖淥波、Nancie Dupier接替，分別成為北亞同東南亞業務主管。

報料電郵﹕piano@mingpao.com