名裁縫嘆上海搵舖艱難

【明報專訊】上海名店林立，港商要去分一杯羮，真係唔容易。佢哋要喺上海嘅大商場爭靚舖，都要同外國品牌拗手瓜。有港商話，即使係由港人開嘅商場，都唔會優惠港商，業主執正嚟做，睇生意額決定舖位位置。

曾獲《華爾街日報》評為「最著名的香港裁縫之一」、專門替客度身訂做西裝嘅ASCOT CHANG「詩閣」，喺香港嘅半島酒店、中環，甚至美國比華利山都有開舖，名氣不下於國際大牌子。佢哋入咗內地市場一段時間，北京、上海、杭州開設咗八間分店。小琴早排喺上海碰到詩閣董事經理張宗琪Tony，佢專誠為徐匯區港匯廣場嘅「新舖」搞開張儀式，所謂「新舖」，其實係由三樓嘅店舖搬到一樓（即地面）。

港人老闆商場 一樣冇面畀

Tony話一直都爭取喺港匯一樓開舖，因為人流較多。不過，業主要睇店舖生意額決定位置。生意做得好，至可以搬去一樓。一樓大部分係外國大牌子，Tony話佢哋終於做到成績，可以安排落一樓嘅位置，真係可喜可賀。港匯係恒隆地產（0101）嘅項目，照計人在他鄉，香港人或者可以互相照應一下。不過，香港人維持執正嚟做嘅精神，一視同仁，唔會隨便徇私，可以作為好榜樣。

小琴知道另一知名品牌「源Blanc de Chine」，都好想喺上海搵靚舖。呢個牌子最出名係中國服飾、旗袍，瑞安房地產（0272）主席羅康瑞同太太朱玲玲都係捧場客。羅康瑞喺上海有新天地，源Blanc de Chine去新天地開舖會否有租金優惠？源Blanc de Chine營運總監莫藻亮話，始終係一盤生意，大家都係公事公辦好。

報料電郵﹕piano@mingpao.com