投行賓架棄黑莓 要iPhone

【明報專訊】冇錯！小琴承認自己愛靚唔愛命！男友最好似吳彥祖或者古天樂，用嘅科技產品梗係首選iPhone、iPad或者係嚟緊嘅Macbook Air啦。講開iPhone，小琴都有留意蘋果最新公布嘅業績，特別係iPhone一季賣出超過1400萬部，超越埋對手RIM嘅黑莓手機，加上喬布斯惹火嘅言論引發口水戰，分分鐘好睇過唔少抄橋嘅電視劇。iPhone銷量可以超越黑莓，絕非偶然，小琴近排同渣打、摩通以及一大班中環賓架吹開水，發覺以前大家拎住黑莓嘅賓架已經轉咗用iPhone，一問之下，原來佢地成個部門由原來嘅黑莓轉晒用iPhone，仲內置公司內聯網、「推郵」（push mail）等等。

賓架同小琴講，因為以前用黑莓收發電郵太方便，班同事個個都埋頭喪「㩒」，個別過咗火嘅更加出現拇指筋腱發炎，搞到因小失大，成個星期唔打得字，所以公司最終決定一次過換晒佢。另一個賓架就同小琴講，佢地可以選擇用黑莓抑或用iPhone，換轉係小琴嘅話就諗都唔使諗啦。