周文耀出山 做中行非執董

【明報專訊】財金界人物退休後，紛紛加入內地銀行。繼金管局前總裁任志剛，被委任為建設銀行（0939）獨立非執董後，港交所（0388）前行政總裁周文耀，亦加入中國銀行（3988）做獨立非執董，為期3年，基本酬金為每年20萬元人民幣。

周文耀今年1月退休，小琴仲記得，周文耀退休後同記者話，佢未必會參與其他金融界工作，應該會做吓公職或者公益事務，得閒就讀吓書，鑽研一吓中國歷史同文學之類。至於有冇其他上市公司敲門搵佢做非執董，佢當時貫徹其「口密」作風，一概唔答。

能者多勞 兼任多項公職

估唔到未夠一年，佢就出山效力中行。不過，呢份唔係佢退休後首份工作。今年4月政府公布，周文耀退休後首份工作係「回歸」香港數碼港管理有限公司，出任董事局主席。呢個職位冇人工收，純粹係義務工作。周文耀喺2003至07年做過數碼港董事，都算喺回歸舊地。

事實上，周文耀退休後百足咁多爪，兼任好多公職，包括：香港大學代理司庫、校務委員會及校董會委員、國際培幼會（香港）董事及沙特證券交易所公司（Tadawul）國際諮詢委員會成員。

報料電郵﹕piano@mingpao.com