新濠獎學金 助員工女兒上大學

【明報專訊】澳門有唔少人都喺賭場打工，做阿媽嘅，當然希望仔女發揮其他技能。新濠國際（0200）聯營公司新濠博亞（下稱：新濠）設立獎學金，頒發畀3個員工及5個員工直系家屬。一名清潔工人嘅女兒獲獎，呢位媽媽話好開心個女可以入讀大學，唔需要行媽媽嘅舊路。

員工：獲獎學金如中六合彩

歐陽月娟喺新濠做清潔工，佢要改變自己嘅命運太遲，但子女年紀仲細，「我唔想佢哋走上我嘅舊路，我希望佢哋能夠改變命運。」喺摩卡娛樂場打工嘅陳晶晶，本身要一邊工作一邊讀書。佢話上司支持佢返學，上課果晚會畀佢準時收工，考試期間又幫佢減輕工作量。今次攞埋獎學金，成為學習推動力。

喺新濠天地工作嘅周雅儀形容，獲得獎學金同中六合彩一樣，係人生難得嘅機會。梗係啦，打工仲有獎學金攞，小琴睇到都好羨慕，而員工嘅家人都可以受惠，都算係愛屋及烏。