新聞類別
財經
詳情#
【明報專訊】「你知不知道，我等到花兒也謝了……」，呢首歌兩年來應該無時無刻响中銀國際副執行總裁謝湧海心中響起。事關中銀有份向中央提出嘅「港股直通車」同「小QFII」兩大建議，等極都未有下文，真係等到花都謝埋，等到謝總心也碎。
所謂「小QFII」，喺指境外人民幣通過香港嘅中資證券與基金公司回流內地投資A股嘅機制。小琴噚日見到謝總，當然要問吓佢「小Q」幾時嚟，小琴袋中嘅「人仔」何時先可以直接買A股？謝總帶住苦笑咁話，雖然「小Q」呢條「人仔回流」好橋，中銀有份出謀獻計，但佢都答唔到呢「Q」幾時可以打得出。
情况就好似當年嘅「港股直通車」，中銀一早做足晒準備工夫，佢都疊埋心水等中央公布呢個震撼全球嘅好消息，誰知等吓一個月，等吓又一個月，等來等去都無聲氣，等到佢都差點唔記得有呢回事之際，中央又失驚無神公布話有「直通車」。謝總仲記得當時佢坐緊火車去深圳開會，無端端有人打電話同佢講架車「得咗」。所以，呢種漫長等待嘅感覺，已經成為咗謝總生活嘅一部分。
港股直通車 早有前科
雖然謝總成功等到中央公布「直通車」方案，但架車遲遲無法出廠，最後更是蹤影全無，小琴好擔心呢回「小Q」嘅命運會唔會一樣咁悲，會唔會「未出Q已撻Q」呢？不過，謝總對「小Q」仍然好有信心，事關中央非常認同呢個方向，只係希望揀個適當時機拍板推行，大家要畀啲耐性，千祈唔好咁心急。
報料電郵﹕piano@mingpao.com
回應 (0)
