陽光房產以智仁勇經營

【明報專訊】恒基主席「四叔」李兆基要陪住3個男孫，一定好唔得閒，日前公布喜訊後，佢仍然未露面。不過，集團上上下下都替佢開心，恒基系嘅陽光房地產（0435），行政總裁吳兆基表示，日後都要以智、仁、勇（三個孫仔嘅名字為智信、智仁、智勇）作為工作方向。

噚日陽光房地產（簡稱陽光）開股東會，陽光主席兼恒基執行董事歐肇基、陽光行政總裁吳兆基會後同記者見面，大家當然問到四叔抱孫嘅消息。李家多咗3個小朋友，會唔會刺激業務革新？例如﹕用大哥智信、二弟智仁、三弟智勇嘅名字作為物業命名？吳兆基笑住咁話，「我哋會以智、仁、勇為工作方向。」吳生果然識時務，智仁勇都係美好嘅品德，用呢種態度工作，當然係好事。

咁陽光房產旗下嘅物業，又唔會加多啲小朋友設施？吳兆基話，呢一年佢哋都會諗多啲企業社會責任，旗下將軍澳新都城商場，都設有幼稚園同補習社等教育項目，「會唔會因為連中三元再做啲嘢？我哋運作好獨立」。

無忙住湊孫 「四叔仍有返工」

陽光房產咁落力，不過，佢哋就冇份分享四叔封一萬元大利市，只有恒基地產直屬員工受惠，附屬或聯營公司冇份，冇份收利市嘅吳兆基以笑容回答﹕「我哋帶住慶賀嘅心情，同佢哋一齊慶賀。」

歐肇基係恒基執董，有份收大利市。四叔呢排會唔會忙住湊孫，唔得閒返公司？歐肇基話四叔仍然有返工。