投資界女車神賀「大三寶」

【明報專訊】四叔抱孫除咗成功搶到全港8份報章嘅頭版，以及成為一眾城中富豪、賓架們茶餘飯後嘅話題，仲實實在在咁為花舖帶嚟唔少生意，小琴噚日經過四叔以及彼得（李家傑之洋名）辦公室樓下時，發覺陸陸續續有唔少商家、賓架甚至係四叔嘅老友，送花籃或者係名貴蘭花盆栽畀四叔兩父子。

除咗有蘇格蘭皇家銀行香港區總裁朱仁毅，同埋幾位同事有送花籃祝賀四叔外，私人銀行界出名嘅「女車神」呂璧慧（Celene Loo）亦都有份送花畀四叔兩父子，仲係一人一盆茂密嘅蘭花，恭喜四叔喜獲「大三寶」同埋兒孫滿堂。

培育富豪第二代理財

可能唔係每個讀者都知道邊個係呂璧慧，但係城中富豪就好多人都識佢，呂璧慧來頭甚猛，新加坡出世香港長大嘅佢，除咗係哈佛商學院碩士外，仲係法拉利車會會員，鍾意作畫同賽車嘅佢，係上市公司高誠（Crosby，上市編號8088）嘅資產管理高級董事總經理，手頭上嘅身家，閒閒地都超過10億8億，除咗會替客人管理財產外，仲會幫吓手教育城中富豪嘅下一代有關理財同投資嘅概念。

一向人緣甚好呂璧慧非常識做，四叔證實抱得3胞胎男孫後，第一時間送禮賀一賀四叔，得老人家咁歡喜，分分鐘幫智信、智仁、智勇3兄弟管理埋過百億元嘅資產都唔定！