香港衛視新噱頭 外籍人普通話報新聞

【明報專訊】透過衛星傳送嘅香港衛視，噚日正式啟播，佢哋嘅噱頭係外籍人士做主播，不過全部講普通話。香港衛視主席高洪星話，搵外籍主播，希望用西方人嘅思維方式解讀東方，融匯兩地文化，佢仲希望3至5年內，香港衛視可以上市。

想睇呢批主播嘅表現，要買隻天線鑊，或者喺now 368頻道。香港衛視同衛視中文台、鳳凰衛視完全冇關係，佢哋係獨立機構。老細高洪星係浙江大學管理工程專業博士，喺內地同香港投資金融。佢係《新京報》股東，接觸過傳媒運作。佢話搵咗幾個朋友，合共投資10幾億元搞香港衛視。亞視搞咗咁多年都蝕本，香港衛視又諗住幾時有錢賺？高洪星話﹕「兩年就得啦！」佢話內地好多省市想將旅遊、商貿資訊推廣開去，香港衛視可以做平台，收廣告費、冠名贊助。

矢言兩年有錢賺

不過香港衛視廣告價目表都幾揦利，冠名收費由487萬至1252萬港元；廣告收費20秒，由7702至44,150元。冠名回報都好特別，除咗喺節目打出贊助商LOGO，仲會優先報道合作企業相關行業的正面新聞；冠名單位嘅專訪，宣稱會存入香港中央圖書館、中國國家圖書館；佢哋主辦嘅世界TV小姐大賽，贊助商會成為評委。

香港衛視暫時只有一條頻道，遲啲會加多5條頻道，家喺香港、部分東南亞國家收睇到，大陸仲要等批文先可以落地。集團仲話要開拍電影《三國荊州》、喺湖北省投資主題公園，睇嚟高主席諗頭唔少。