謝瑞麟家嫂：老爺回巢 要睇能力

【明報專訊】國美（0493）有管理權爭拗、新地（0016）有兄弟鬩牆，本港資本市場今年爭執愈來愈多，剛於今個月公布的，有珠寶大亨謝瑞麟入稟法院向個仔謝達峰，追討佢手上持有的謝瑞麟（0417） 股份。噚日公司管理層在事件公布之後首次見傳媒，大家當然都好想知道，既係新抱又係主席嘅謝邱安儀，夾喺老爺同老公之間，係咪左右做人難，不過謝太就以私人事件為理由，唔係好肯回應事件。佢話，單官司同公司冇直接關係，好難透露準確嘅信息，但佢哋一班管理層都會做好自己責任，覺得事件唔會對公司帶來影響。

拒評會否退任主席

記者當然唔肯放過謝太，有人問，老爺謝瑞麟都70幾歲，應唔應該返嚟公司打骰？謝太就強調，呢個唔係應唔應該嘅問題，因為呢樣嘢應該交返畀有關部門判決，但公司請任何人，都會以佢嘅能力同公司有冇需要決定，謝生回唔回巢，要根據「有冇能力」同「公司睇法」嚟判斷。被問到擔唔擔心老爺若果攞返控股權，新抱會唔會要將主席之位拱手相讓？謝太就以問題屬於揣測，以不方便為由唔肯回應。小琴就覺得，當日謝瑞麟父子雙雙身陷囹圄，全靠新抱謝邱安儀力挽狂瀾，先成功復牌，仲交出份靚靚仔仔嘅成績表。閉門一家親，就算間公司控股權誰屬，管理層都係不變應萬變好。