華懋伙宋慶齡基金做善事

【明報專訊】華懋慈善基金同陳振聰就龔如心嘅千億元遺產打官司時，一再強調要完成小甜甜嘅遺志，利用遺產做慈善工作。法官有冇被感動小琴就唔知，但小琴當日就好希望佢哋能夠打贏陳振聰。但噚日龔仁心竟然話，基金暫時無善款。可以花16億投地，但竟然無錢做慈善？龔仁心解釋，因為遺產官司仲未完，所以基金會暫時無善款。

官司未完 小甜甜遺產未捐得

事實上，雖然基金仲未有「子彈」，但已經為將來嘅慈善工作做準備。龔仁心噚日同中心、恩心兩位姊妹以及兩位公子，代表華懋慈善基金去到北京人民大會堂，同中國宋慶齡基金會簽署協議，宣布共同設立「中國宋慶齡基金會華懋慈善基金會」，承諾捐款予青海、甘肅、寧夏等西北省份，以及中國殘疾人福利基金。

龔仁心會後話，由於官司未完，今次所簽嘅僅為意向性協議，捐款數額暫時未有決定。佢仲話，未來華懋基金會喺內地嘅慈善方向將主要針對基礎教育，「哪裏需要去哪裏。只願意雪中送炭，不願錦上添花」。

宋慶齡基金會係紀念原國家名譽主席宋慶齡（國父孫中山遺孀），於1982年5月成立，噚日除咗基金會常務副主席常榮軍有出席外，全國政協兩名副主席李金華、陳宗興同民政部要員都有出席。