大劉公子：港人好明顯仇富

【明報專訊】樓價持續急升，仇富突然成為社會嘅討論問題，各大孖沙亦對仇富發表意見。日前信置（0083）主席黃志祥表示不覺得本港出現仇富情緒，並認為香港仍係一個和諧同平安嘅社會，華置（0127）大股東劉鑾雄嘅公子、華置董事劉鳴煒噚日被傳媒問到社會有無仇富心態時，佢不但只話有，仲要話係「好明顯有」，雖然同黃志祥大家都係大孖沙，但係就有唔同嘅睇法。

噚日劉鳴煒喺集團旗艦商場尖沙嘴「The ONE」開幕儀式後，佢就話「好明顯有仇富，但短期相信無辦法解決，呢個係長期政府、社會同商界互相協調同共同處理。」

反對資助無儲蓄人士買樓

佢喺回應80後難上車嘅問題上，就明撐曾經講過「唔係買樓先有幸福」嘅運輸及房屋局長鄭汝樺。「我偏向鄭汝樺喺上周末講嘅睇法，若無儲錢，無Deposit（儲蓄）去買樓，呢種並唔係可行嘅做法。」對於政府應否資助市民買樓，佢就話：「政府要慎重考慮資助啲係乜嘢人，我唔贊成資助無deposit嘅人去買樓，因為咁樣做會對儲錢買樓嘅人唔公平！」

市場日前曾盛傳，大劉女友呂麗君及陳凱韻（甘比）大手認購昨天首日掛牌嘅新股友邦保險（1299）。對於自己有否抽友邦保險，佢就話個人無買，因自己為公司工作好忙，未有時間作投資。

報料電郵﹕piano@mingpao.com