四大地產商齊賣公益廣告

【明報專訊】小琴唔係迷信嘅人，但噚日揭報紙時，見到四大地產商不約而同，「大曬冷」賣全版廣告，唔係宣傳新樓盤，而係宣傳企業形象。小琴忍唔住睇吓日曆，究竟係咩大日子？長實（0001）主席李嘉誠宣傳慈善基金、新創建（0659）搞行山活動、而信和（0083）同新鴻基（0016）就宣傳企業形象。

李嘉誠名下嘅李嘉誠基金會，成立咗香港仁愛香港，撥咗3億元接受公開申請。噚日展開第二輪程序，就係公眾投票環節，公眾可以喺首輪入圍嘅項目中，選出認為符合教育、醫療、文化、公益嘅項目，勝出者可獲撥款實踐計劃。

而新創建就搞咗個香港地貌行活動，由今個月中至出年1月，有3次行山活動，帶領市民欣賞香港奇岩怪石，噚日咁啱正式接受報名。

類似宣傳料陸續來

發言人話唔知道其他集團噚日推出活動，佢哋第三年舉辦，每年反應都唔錯，噚日就已經收到逾千人報名。

而信和同新鴻基參與咗一個慈善活動，順道賣廣告宣傳集團參與義工、環保、籌款項目。

社會成日討論仇富氣氛，地產商冇理由感受唔到壓力，積極回應，支持社會活動，相信是大方向，日後料會有更多呢類企業形象的宣傳攻勢。

報料電郵﹕piano@mingpao.com