民企之父大爆揀股秘笈

【明報專訊】有「民企之父」之稱嘅瑞銀中國投資銀行部副主管張化橋發表新書《投行分析師的叛逆宣言》，除咗請到陸東、馮孝忠等星級嘉賓撐場之外，仲發揮一貫嘅風趣幽默，喺開放畀公眾入場嘅新書發布會及投資講座上，講起佢嘅投資策略嘅時候，就引起台下一陣陣笑聲。

話唔好揀見報率太高股票

張化橋話以前做分析師個時，每日忙得不得了，成日周圍飛，根本冇時間真係做分析，直到轉做深控（0604）嘅執董兼首席營運官，先有時間睇書同年報。佢又教台下觀眾點樣揀股票，話篩走最大、最小、太貴、明顯不好以及見報率太高的股票，是但揀10隻餘下嘅股票，長期落去就一定唔會輸咁話，仲叫觀眾用近視嘅眼睛去投資，只可做長期且模糊嘅預測，千祈唔好試圖做精確嘅預測喎。當記者問佢關於資產泡沫時，佢就同佢講嘅理論一樣，話唔做短期預測，但就覺得家資產價格仲係合理，中長期會有升幅。

張化橋講完之後，到下一位講者、招商證券香港投資銀行業務董事總經理溫天納演講，本來溫天納預備咗一大堆預測數據來講宏觀經濟，但聽完張化橋嘅理論後，都話要飛走晒啲數字，唔做預測喎。