新聞類別
財經
詳情#
【明報專訊】「賣開菲林，轉賣護膚品，咁都得？」小琴第一次聽嘅時候，都同大部分人一樣覺得錯愕。
話說，日本富士品牌做菲林出晒名，之但係數碼相機嘅興起，賣菲林已經無市場，於是乎4年前用菲林的技術大打Fuji Film Beauty護膚品，係日本做得有聲有色，最近連一向喺中港代理富士菲林嘅中港照相（1123），亦轉型做富士香港區嘅護膚品牌代理。
消息係上個月畀電視台報道之後，股價單日炒高37%。而噚日有報紙報道話，中照有信心3年之內可以有7800萬元嘅生意額，仲有可能會奪得富士護膚品嘅內地代理權，雖然公司中午發通告澄清，話同富士未有新嘅內地合作計劃，但已經足以再一次舞高股價15%，收市報0.75元。
富士生產菲林 須用膠原蛋白
究竟菲林同護膚品有咩關係呢？原來富士係生產菲林嘅時候，會用到女士養顏恩物「膠原蛋白」，唔經唔覺做咗「膠原蛋白」專家，所以索性專注發展大家可能已經聽過嘅「Astalift」護膚品牌。
依家就連代理開菲林嘅中港照相，亦都幫富士做護膚品牌代理，要徹底體現呢個概念，小琴建議中照應該改番個靚名，例如叫做中港照相美麗，又或者中港菲林護膚，令到股民一睇就明白，咁就相當好喇！
留言 (0)
