新資本3董事要辭職 原因話太攰

【明報專訊】新資本國際（1062）10月底出通告，話3個董事石濤、林思雨及熊威，因「個人理由」請辭。噚日再出澄清通告，解釋佢哋請辭嘅「個人理由」，「他們太疲累及希望結束他們在香港的業務」。

3人均不超過50歲

睇番2009年年報，佢哋3個年齡分別46歲、39歲同47歲。照計今年都係50歲以下，正值人生事業黃金時期，咁快嗌攰，係咪已經搵夠，可以提早退休呢？

09年年報披露，石濤06年11月開始做新資本董事，佢家仲擔任中國海澱（0256）執董。

林思雨同熊威08年先加入，林思雨就擔任喺上海上市嘅冠城大通股份副總經理。佢哋3個經常缺席新資本董事會議，09年總共4次董事會，林思雨出席過一次，石濤同熊威就全部缺席。

新資本有不同業務，包括投資武漢房產；有一家聯營公司製造儀表及精準量度儀器；又同一家天津公司合營城市用水設施及環保項目。