清明上河圖 中環恒生都有得睇

【明報專訊】遠道而來嘅電子版清明上河圖，今日起喺香港亞洲博覽館展出，相信唔少港人都已經撲咗飛，以一睹中國頭號名畫動畫版嘅風采。買唔到飛嘅朋友都唔好太失望，因為恒生銀行（0011）噚日出咗份新聞稿話，中環恒生總行其實一直都掛住一幅仿《清明上河圖》壁畫，雖然呢幅畫冇特技效果，但相信係本港最大型的仿製畫，都值得一睇㗎！

91年開始放新總行大堂

恒生表示，幅壁畫闊42呎、高8呎，早喺1991年恒生新總行大廈落成時，已安放於銀行大堂中央。恒生選擇仿製《清明上河圖》最繁囂兼最具代表性嘅虹橋畫面，原意係以畫中繁榮嘅市場景象，同銀行大堂繁忙業務互相輝映，難得《清明上河圖》電子版今次來港掀起熱潮，恒生以全港最大型仿製壁畫作招徠，可能都會吸引到啲市民前來觀賞，到時恒生可以順便sell吓客添，真係一家便宜兩家着。

小琴今次有兩樣嘢想讚吓恒生，其一就係當年決定掛呢幅壁畫嘅管理層，確係有心思有品味，君不見《清明上河圖》背景正是商貿發達嘅北宋時期，畫中人生活五光十色，商販爭相叫賣，簡直係香港目前嘅寫照，加上係中國名畫而非來路貨，啱晒香港背靠祖國嘅定位。其二，喺呢個資訊爆炸嘅年代，各大公司如果想發布軟銷品牌嘅消息，要搶版面其實非常考功夫，但恒生公關部竟然諗到食住上河圖熱潮，吸引客仔蒞臨，確係有料到！