「巴菲業」教美聯員工 One Life One Job

【明報專訊】美國有巴菲特，香港就有個「巴菲業」。巴菲業係邊個？就係美聯集團（1200）主席黃建業。美聯噚日發新聞稿，形容主席黃建業係香港地產代理界巴菲特，佢早前同20位Top Sales（頂級銷售員）食咗一餐Magic dinner，分享佢對樓市嘅睇法，佢仲呼籲同事想發達，就要堅持「One Life One Job」（一生一份工）。

黃建業話美國QE2大印銀紙，令到本港樓市水漲船高。佢預計樓市會進入第三期大升浪，鼓勵各主管把握機遇。新聞稿裏面嘅形容詞，真係字字珠璣。形容要盡快，就連快馬加鞭都未夠，話要「飛馬加鞭，抓住難得機遇」喎。黃主席仲贈咗個「發達錦囊」畀員工，一招係「One Life One Job」、另一招係終生勤力。全個錦囊有8招，下次小琴見到「巴菲業」，一定要問埋其餘6招係乜。