任志剛：金管局高薪政策救港

【明報專訊】任志剛統領金管局近17年，堪稱全球經驗最豐富嘅中央銀行家之一。雖然佢老人家已離任，但人人都叫番佢做任總。近兩年世界金融市場立立亂，當然多人求教任總，任總亦十分慷慨，頻頻開腔提點，噚日就應大摩之邀，在獅城演講，總結歷次金融危機的教訓。

任總今次嘅講話，小琴諗金管局上下特別啱聽。佢講到中央銀行要發揮監管角色時，獨立性好重要，所以要有好人才，亦因為如此，央行要關注金融業嘅薪酬安排之餘，都要關注自己的薪酬。佢話93年成立香港金管局時，佢已經堅持金管局薪酬水平要參考私人市場。亦都因為呢個政策，所以金融管理局帶領香港安然渡過兩次金融危機咁話。

當年任總以逾千萬元年薪，長期成為全球人工最高央行行長，一直被議員針對，搞到接任嘅陳德霖，要減人工去到最多都只係得750萬。

不過，金融海嘯後，人人都話金融業高層薪酬過高，報酬設計又無形中鼓勵員工作短線高風險投資，好唔合理，歐美都話要監管吓。如果央行自己的薪酬吓吓都要同私人市場攀比，央行又能否獨立地，及早發現銀行與券商的激勵機制有問題呢？