民主黨區諾軒任民陣召集人

【明報專訊】民陣噚日舉行周年大會，選出新一屆召集人，結果由民主黨「乳鴿」、南區區議員區諾軒擔任，至於秘書處同副召集人，民陣就話稍後會籌組，預計下次大會至通過。


區諾軒就話，面對嚟緊嘅選委會及特首選舉，佢希望組織民間力量表態，相信碎片化嘅時代，無法為推動社會改革帶嚟出路，需要嘅係更多諒解同團結。


過去民陣召集人等職位，較少由政黨人士做，皆因民陣負責協調唔同政黨同民間團體，但據聞民陣一直好難搵人接手做召集人，但呢啲義務工作點都要有人負責，最終搵咗曾經喺民陣秘書處幫過手嘅區諾軒做召集人。雖然民陣平時無好大角色，但每年七一遊行或遇上重大政治事件發生要示威，民陣都會統籌，包括同警方開會商討遊行路線咁，工作都唔算少。


民主黨12月換屆，本身係中委成員嘅區諾軒，就決定唔再參選中委喇。