光纖標籤計劃 獨電盈唔參與

【明報專訊】「有光纖，定無光纖」，唔知大家仲記唔記得，幾年前，幾大網絡商鋪天蓋地嘅廣告戰，一個話自己的光纖已經鋪到你門口，另一個就話人哋嗰條只不過係銅線。紛爭過了幾年，電訊管理局噚日終於出手，推出兩個標籤，一個叫「光纖到戶」，另一個係「光纖到樓」，等大家分清楚條光纖，去到你門口，定止於大廈門口。不過，全香港最大嘅寬頻電訊商電訊盈科（0008），卻無參與其中，究竟係懶得登記、定唔想畀人知自己條光纖有幾巴閉呢？

可以查光纖到戶或到廈

據電管局講，呢個係自願登記嘅計劃，係由電訊商同大廈自由登記，家共有超過8000幢大廈登記咗，佔全港用戶數目66%。電管局嘅發言人話，市民可以上網查吓自已大廈，有幾多個網絡商提供光纖到戶（最高速度可達1000Mbps）、或者光纖到大廈（最高速度可達100Mbps）嘅寬頻服務，希望呢個計劃可以推動電訊商，加快發展光纖網絡咁話。不過，全港6間電訊商，獨欠電盈無登記，所以資料未必全然準確。至於點解電盈唔參加，電管局就無正面答喇。

尤記得兩年前，電盈行政總裁艾維朗曾經豪言，話電盈香港鋪設的光纖總長度，足足可圍繞地球轉30個圈，唔通電盈擔心自己嘅光纖網絡曝光，會嚇親其他對手，小琴奉告一句，「少擔心！」，事關市民係網上，剩係睇到大廈有幾多個光纖網絡，係睇唔到條光纖屬於邊間網絡商。

既然睇唔到係邊間網絡商，咁有咩作為呢？電管局話，家大家咁鍾意上網，得閒可以睇吓屋企有光纖未，都幾有趣喎，網址係http://app1.ofta.gov.hk/apps/fibre/content/search.asp。

報料電郵﹕piano@mingpao.com