「夢想飛機」787

【明報專訊】一講豪華飛機，大家會識得空中巴士（Airbus）A380，但暫時只有外國航空公司先有，例如新加坡航空、澳洲航空。而另一家炮製緊豪華飛機嘅波音（Boeing），製造緊波音787型夢想飛機（Dreamliner），同A380有得揮。南方航空（1055）將會係首家大陸航空公司，擁有波音夢想飛機。

中國有份製造配件

南航話，第一架波音787夢想飛機，會用喺國際航線。波音787好處係慳油，減少20%耗油量，空間寬啲。波音原定2007年完成，國航（0753）、東航（0670）都訂咗，仲諗住2008年奧運期間載客，可惜好夢成空。波音預計出年交貨，但上周喺美國試飛時機艙冒煙，可能都會再延遲交貨。波音話，呢架波音787係跨國合作，中國都有份製造波音787配件，包括方向舵、翼身整流罩和垂直尾翼前緣。