肥馬大讚趕走炒家做得好

【明報專訊】政府重槌擊退炒家穩定樓市，離開官場後現任中策集團（0235）主席嘅馬時亨話，佢一向「不在其位，不謀其政」，但今次都忍唔住要讚吓政府，出手做得好啱，佢話早前為咗了解民情專登走去睇樓，內籠只有約1700呎嘅新界獨立屋，賣價近3000萬元，肥馬呻晒口話「我都買唔起呀，咁鬼貴！」家炒家離場，對用家絕對係好事。

了解民情 專登去睇樓

馬時亨住咗半山豪宅澄碧閣，小琴話佢點會買唔起樓吖，佢亦承認無諗住要買樓搬屋，會繼續住喺舊宅「50年不變」，之但係，市民買樓有羊群心態，之前樓市升得勁就買呀買，到政府出招穩樓市，有人就話影響用家，佢就同小琴講，唔排除會有人受影響，但對整體樓市健康發展而言，財爺今次出手可以將樓市泡沬撥開。

唔少炒家都因無得炒樓而離場，股票市場好自然被視為另一投資地盤，會唔會製造另一堆泡沫呢？馬時亨就話：「若果資金真係由樓市轉到股市，今日港股就唔會大跌啦！……唉！影響股市嘅因素多的是，好似邊個估到北韓會發個炮彈，打散個市吖？」

對於早前佢嘅舊同事發展局長林鄭月娥，暗話地產商「鬼拍後尾枕」，馬時亨話佢已經唔喺政府度做，唔會comment喎。

小琴之後當然追問佢，中策集團收購南山人壽失敗後，家有乜搞作？佢笑笑口話行政總裁柯清輝近日好忙，積極物色收購對象，適當時會作出公布喎。

報料電郵﹕piano@mingpao.com